తెలంగాణ అంశంపై ఏకాభిప్రాయానికి రాలేకపోయిన పార్టీలు

తెలంగాణ అంశంపై మంగళవారం కేంద్ర హోంశాఖ ఆధ్వర్యంలో నార్త్‌బ్లాక్‌లో జరిగిన సమావేశం ఎలాంటి ఏకాభిప్రాయానికి రాలేకపోయింది. దాదాపు నాలుగున్నర గంటల పాటు జరిగిన ఈ సమావేశంలో పార్టీల ప్రతినిధులు భిన్నస్వరాలు వినిపించారు. తమ తమ వైఖరుల్నే అక్కడా ఉద్ఘాటించారు. దీంతో తదుపరి చర్చలు కొనసాగుతాయన్న సంకేతాలు ఈ భేటీ ద్వారా వెలువడ్డాయి. ఈ చర్చలు ఏ రూపంలో ఉంటాయి? దానికి ఎలాంటి యంత్రాంగం ఏర్పడుతుంది? చర్చల కాల పరిమితి ఏమిటిన్నది ఇప్పడు కేంద్రం వెల్లడించాల్సి ఉంది. రాష్ట్రంలో గుర్తింపుపొందిన 8 రాజకీయ పార్టీల నుంచి ఒక్కో పార్టీ తరఫున ఇద్దరు చొప్పున మొత్తం 16 మంది ప్రతినిధులు, హోంమంత్రి చిదంబరం, ఆ శాఖ కార్యదర్శి గోపాలకృష్ణ పిళ్త్లె, నిఘా విభాగం(ఐబీ) డైరెక్టర్‌ రాజీవ్‌ మాథుర్‌, ముఖ్యమంత్రి రోశయ్య ఈ సమావేశానికి హాజరయ్యారు. రాష్ట్రంలో శాంతినెలకొల్పాలని ఎనిమిది పార్టీలు ఆ తర్వాత ఉమ్మడి ప్రకటన చేయడం తప్ప సమావేశంలో మరే ఫలితం వెలువడలేదు. ఓ వైపు ఈ సమావేశం నడుస్తుండగానే బయట జై తెలంగాణ, జై సమైక్యాంధ్ర నినాదాలు మిన్నంటాయి. దీంతో నిరసన కారుల్ని పోలీసులు అరెస్టుచేసి, పోలీసుస్టేషన్‌కు తరలించారు.

తెలంగాణ అంశంపై అన్ని పార్టీల అభిప్రాయాల్ని చిదంబరం తెలుసుకున్నారు. ఈ అంశంపై ఓ యంత్రాంగం రూపకల్పన, సంప్రదింపుల కొనసాగింపునకు మార్గదర్శక ప్రణాళిక రూపకల్పనే సమావేశం ఎజెండా అయినప్పటికీ... పార్టీలు మాత్రం దాన్ని పట్టించుకోకుండా ప్రాంతీయ వాదనల్ని వినిపించే ప్రయత్నంచేశాయి. ఒక్క భాజపా తప్ప అఖిలపక్ష సమావేశానికి హాజరైన ఏ పార్టీ కూడా తదుపరి, విస్తృతస్థాయి చర్చలకు వ్యతిరేకత తెలియజేయలేదు. వాటి నుంచి వ్యక్తమైన భిన్నాభిప్రాయాలను దృష్టిలో ఉంచుకొని రాష్ట్రంలోని వివిధ వర్గాలతో భవిష్యత్తులో విస్తృత సంప్రదింపులు జరపాలని కేంద్రం నిర్ణయించినట్లు తెలుస్తోంది. ఈ ప్రక్రియపై చిదంబరం ఏ క్షణంలోనైనా ఓ ప్రకటన చేయొచ్చునని అనుకుంటున్నారు. దీనికి ఒక హేతుబద్ధమైన కాలపరిమితి ఉండాలని హోంశాఖ భావిస్తోంది. కాంగ్రెస్‌లో చర్చించిన తర్వాతే భవిష్యత్‌ మార్గసూచి ఖరారవుతుంది. హోంమంత్రి మూడ్‌ను చూస్తే కేంద్రం ఓ కమిటీ వేస్తుందేమోనని అన్ని పార్టీలు అభిప్రాయపడుతున్నాయి. చర్చల ప్రక్రియకోసం యంత్రాంగం ఏర్పాటుకు భాజపా, సీపీఐ మినహా మిగతా పార్టీలన్నీ అంగీకరించాయి. అవసరమైతే మరికొన్ని అఖిలపక్ష సమావేశాలు కూడా ఉండొచ్చని చిదంబరం సమావేశానంతరం విలేకరుల ముందు వెల్లడించారు.